Dyddiad
Mae Comisiynydd Heddlu a Throsedd Gogledd Cymru Andy Dunbobbin wedi addo ei gefnogaeth i Wythnos Ymwybyddiaeth Stelcian (24-28 Ebrill) gan Ymddiriedolaeth Suzy Lamplugh, yn canolbwyntio ar gynorthwyo pobl ifanc o dan thema ‘Gwrthsefyll Stelcian’, yn dilyn cynnydd yn y nifer o bobl rhwng 16 a 24 oed sy’n cysylltu â’r Llinell Gymorth er mwyn cael cyngor ar sut i ymdrin ag ymddygiad di-angen.
Mae stelcian yn digwydd pan fydd rhywun yn ymddwyn mewn ffordd sy’n eich gwneud chi deimlo’n ofnus, mewn gofid neu’n cael eich bygwth. Mae gwahanol ffyrdd o stelcian a gall unrhyw un ddioddef. Mae’n un o’r meysydd rydym yn ceisio ymdrin ag o drwy Ymgyrch Unite (dolen i’r ymgyrch).
Yn ystod Wythnos Cenedlaethol Ymwybyddiaeth am Stelcian, mae heddluoedd, asiantaethau eiriolaeth ac elusennau yn dod at ei gilydd er mwyn codi ymwybyddiaeth am stelcian.
Mae’r gweithgarwch dwysach yn cael ei arwain gan Ymddiriedolaeth Suzy Lamplugh. Cafodd yr ymddiriedolaeth ei chreu gan rieni Suzy Lamplugh – Paula a Diana nôl yn 1986 ar ôl i’r ferch 25 oed ddiflannu tra’n gweithio fel asiant gwerthu tai yn dangos cwsmer o amgylch tŷ yn Fulham.
Nid ydy corff Suzy erioed wedi ei ganfod, ond mae’n debygol ei bod wedi cael ei llofruddio ac fe gadarnhawyd yn 1993 yn gyfreithiol ei bod wedi marw.
Mae’r wythnos ymwybyddiaeth yn cyd-daro â chyhoeddi llyfryn ar Drais yn erbyn Menywod a Merched (VAWG), a gynhyrchwyd ar y cyd gan Swyddfa’r Comisiynydd Heddlu a Throsedd a Heddlu Gogledd Cymru, yn rhoi cyngor a ble i fynd am gymorth a chefnogaeth.
- Mae copi caled ar gael mewn cownteri blaen gorsafoedd heddlu
- Gallwch lawrlwytho copi yma
- Ewch i gael gwybodaeth ar y we
VAWG yw unrhyw drais ar sail rhywedd sydd wedi’i anelu at ferch oherwydd ei bod yn ferch neu drais sy’n cael ei ddioddef yn anghymesur gan ferched. Mae’r mwyafrif o VAWG gan ddynion yn erbyn merched a genethod (er gall dynion hefyd ddioddef trais neu gam-drin).
Dywedodd Andy Dunbobbin, Comisiynydd Heddlu a Throsedd Gogledd Cymru: “Rwyf eisiau pob dioddefwr wybod lle i gael cymorth ac mae’r llyfryn yma yn hynod o werthfawr i ddarganfod sut i gael cymorth, stopio’r drosedd a gwneud newidiadau.”
Dywedodd y Prif Gwnstabl Heddlu Gogledd Cymru Amanda Blakeman: “Mae Heddlu Gogledd Cymru wedi ymrwymo dileu Trais yn Erbyn Merched a Genethod. Ein bwriad ydy gwneud Gogledd Cymru’r lle mwyaf diogel i fyw, gweithio ac ymweld yn y DU. Byddwch yn ymwybodol y byddwn yn ymdrin ag unrhyw adroddiad yn ddifrifol ac amserol.”
Sut i gael cymorth
- Mewn argyfwng, ffoniwch 999 bob tro
- Ffoniwch 101 os nad yw’n argyfwng ond hoffech gael cyngor gan yr heddlu
- Cysylltwch â’r Ganolfan Cymorth Dioddefwyr yn Llanelwy ar 0300 30 30 159 neu ewch ar victimhelpcentrenorthwales.org.uk
- Mae’r Llinell Gymorth Stelcian Genedlaethol yn rhoi cyngor ac arweiniad i ddioddefwyr presennol a blaenorol stelcian ac aflonyddu – ffoniwch 0808 802 0300. Dilynwch @TalkingStalking ar y cyfryngau cymdeithasol
- Mae Ymddiriedolaeth Suzy Lamplugh yn darparu cyngor diogelwch personol drwy eu gwefan suzylamplugh.org neu dilynwch nhw ar y cyfryngau cymdeithasol drwy @Live_Life_Safe
- Mae’r Gwasanaeth Paladin yn wasanaeth trawma sy’n cynorthwyo dioddefwyr risg uchel o stelcian. Ewch ar eu gwefan paladinservice.co.uk http://www.paladinservice.co.uk
- Mae cyngor a gwybodaeth am drais ar y we ar gael drwy Information and support on tech abuse | Refuge Tech Safety ynghyd â Cyber stalking – What to do if you are being stalked — The Cyber Helpline ac Online harassment & bullying guide — The Cyber Helpline