Dyddiad
Gellir cael mynediad at y gwasanaeth a ddarperir gan Gymorth i Ferched Clwyd Alyn trwy ffonio Llinell Gymorth Am Ddim Byw Heb Ofn ar 0808 80 10 800 neu trwy eu ffonio'n uniongyrchol ar 01352 712150. Mae ganddynt swyddfa galw heibio yn 8 Stryd y Ffynnon, Treffynnon, a gellir anfon e-bost atynt yn cahawomensaid@clwydalyn.co.uk
Datgelodd mam i saith o blant fod ei phartner treisgar wedi ceisio cicio a dyrnu ei babi allan o'i chroth pan ddarganfu ei bod yn feichiog ar ôl dod o hyd i sgan mewn drôr.
Rhuthrwyd Gloria, 38 oed, (ond nid ei henw iawn), i’r ysbyty ond diolch i’r drefn fe oroesodd y babi yn y groth yr ymosodiad mileinig a adawodd y fam yn gleisiau du ar hyd ei chorff.
Darparwyd lle diogel iddi gan Gymorth i Ferched Clwyd Alyn sy’n derbyn cyllid gan Arfon Jones, Comisiynydd Heddlu a Throsedd Gogledd Cymru.
Symudwyd Gloria gan Gymorth i Ferched Clwyd Alyn i loches a rhoddwyd y gefnogaeth yr oedd ei hangen arni er mwyn iddi gael ei bywyd yn ôl ar y trywydd iawn.
Ond ymhen ychydig flynyddoedd roedd Gloria yn ôl yn y lloches wedi i ail bartner ei cham-drin a’i churo ar ei hwyneb ac ar hyd ei chorff, gan ei gadael yn gleisiau i gyd.
Bellach dywed Gloria bod y gefnogaeth a gafodd ac sy'n parhau i gael ei roi iddi gan Gymorth i Ferched Clwyd Alyn wedi achub ei bywyd.
Mae Cymorth i Ferched Clwyd Alyn bellach wedi derbyn grant ychwanegol o bron i £29,000 diolch i’r Comisiynydd Heddlu a Throsedd sydd wedi gwneud mynd i’r afael â cham-drin domestig yn un o’i brif flaenoriaethau.
Mae Mr Jones wedi sicrhau cyfanswm o £238,000 gan y Weinyddiaeth Gyfiawnder i gefnogi gwasanaethau trais rhywiol a cham-drin domestig fel Cymorth i Ferched Clwyd Alyn yn ystod pandemig Covid-19.
Yn ôl Gloria, mae hi wedi dewis siarad allan er mwyn annog dioddefwyr eraill cam-drin i beidio â dioddef mewn distawrwydd a cheisio cymorth.
Wrth gofio yn ôl dywedodd: “Mi wnes i ddweud wrth fy mhartner fy mod i'n feichiog ond nid oedd yn fy nghredu. Roeddwn wedi bod ar gyfer fy sgan 12 wythnos ac roedd y llun sgan mewn drôr. Daeth o hyd iddo ac aeth yn lloerig a dechrau fy nghicio yn fy stumog a'm hwyneb. Gadawyd fi yn gleisiau i gyd ond diolch byth mi wnaeth y babi oroesi.
“Gadawodd yr eiddo a chafodd yr heddlu eu galw a chefais fy nghynghori i symud i loches ac mi wnaethon nhw fy rhoi mewn cysylltiad â Chymorth i Ferched Clwyd Alyn. Arestiwyd fy mhartner a chafodd ei garcharu am ymosod arnaf.
“Ar y dechrau, roeddwn i’n ei chael hi’n anodd byw yn y lloches oherwydd fy mod i wedi arwain ffordd o fyw anhrefnus.
“Doeddwn i ddim yn ymddiried yn unrhyw un ohonyn nhw ar y dechrau. Doeddwn i ddim yn ymddiried mewn neb a dweud y gwir. Ond mewn gwirionedd roedd y gefnogaeth gefais i o'r cychwyn cyntaf yn anhygoel, ond doeddwn i ddim yn sylweddoli hynny ar y pryd.
“Roedd fy ngweithiwr cymorth yn anhygoel. Wnaeth hi ddim edrych i lawr arna i na fy rhuthro, roeddwn i'n cael mynd ar fy nghyflymder fy hun.
“Ond yna mi wnes i gyfarfod rhywun arall ac roeddwn i eisiau fy lle fy hun felly mi wnes i bacio fy mhethau a symud i mewn gyda phartner newydd roeddwn wedi ei gyfarfod. Y broblem oedd mai perthynas arall lle’r oeddwn i’n cael fy ngham-drin oedd hon ac nid oedd yn hir cyn iddo ddechrau fy nharo.
“Un diwrnod fe ddechreuodd fy nghuro ar ochr chwith fy wyneb. Yn llythrennol roeddwn i'n ac yn ddu las ac roedd fy llygad ar gau oherwydd y chwydd. Aeth allan i weithio ac mi wnes i ddianc yn ôl i'r lloches.
“Gan mai hwn oedd yr ail dro i mi roeddwn yn gwybod beth i’w ddisgwyl ac roedd fy ngweithiwr cymorth yn wych. Mae hi wedi bod yn amyneddgar iawn ac rwy’n gwybod nad ydw i’r person mwyaf hawdd i ddelio efo nhw. Arhosais yn y lloches am fwy na blwyddyn a chefais gymaint o help.”
Ychwanegodd: “Rydw i wedi bod yn ddefnyddiwr cyffuriau, crac cocên yn bennaf, ac fe wnes i ddiweddu yn y carchar. Roeddwn i'n gwybod bod yn rhaid i mi roi fy mywyd yn ôl at ei gilydd a gweithiais yn galed yn y carchar yn dilyn llawer o gyrsiau. Mi wnes i ddod allan o'r carchar ac mae Cymorth i Ferched Clwyd Alyn wedi bod yno i mi.
“Cyn hir rwy’n mynd i gael gliniadur mae fy mhartner newydd wedi prynu i mi ac rwy’n bwriadu parhau i astudio troseddeg, rhywbeth wnes i ddechrau ei astudio yn y carchar. Rwyf am weithio ym maes proffilio neu rywbeth tebyg. Mae fy swyddog prawf yn fy helpu hefyd.
“Mae fy mhartner newydd yn anhygoel ac yn gefnogol iawn ac mae fy swyddog prawf yn fy helpu hefyd.”
Dywed Gloria fod y gefnogaeth ariannol a gynigir i Cymorth i Ferched Clwyd Alyn gan Gomisiynydd Heddlu a Throsedd Gogledd Cymru yn golygu bod modd ceisio achub mwy o ferched fel hi.
Meddai: “Mae'r gwaith y mae Cymorth i Ferched Clwyd Alyn yn ei wneud yn anhygoel ac mor bwysig. Ydw, rydw i wedi arwain bywyd anhrefnus ac wedi gwneud dewisiadau a phenderfyniadau gwael. Rwy'n berchen ar bob camgymeriad rydw i wedi'i wneud ond ni ddylai unrhyw un ddioddef trais a cham-drin domestig.
“Mae yna lawer iawn o ferched fel fi sydd angen help a chefnogaeth i ddianc rhag partneriaid sy’n eu cam-drin yn gorfforol. Heb i'r arian fod ar gael, ni fydd y merched hyn yn cael yr help sydd ei angen arnynt gan sefydliadau fel Cymorth i Ferched Clwyd Alyn.”
Dywedodd llefarydd ar ran Cymorth i Ferched Clwyd Alyn: “Mae Gloria wedi cael gorffennol cythryblus ac wedi tueddu i fynd o un berthynas anhrefnus i un arall. Mae hi wedi cael bywyd caled o'i phlentyndod ac nid ei bai hi yw llawer o bethau sydd wedi mynd o chwith iddi.
“Yr hyn sydd ei angen ar Gloria yw rhywun i siarad yn onest efo hi heb edrych i lawr arni na’i barnu. Gobeithio bod ganddi bellach bartner a all gynnig rhywfaint o sefydlogrwydd iddi a pheidio â'i cham-drin yn gorfforol nac yn feddyliol ac y bydd hi’n gallu symud ymlaen.
Ychwanegodd: “Rydym yn cyflogi rheolwr lloches, gweithwyr allgymorth, gweithwyr argyfwng a chynghorwyr ac mae ein llwyth gwaith, oherwydd Covid-19, yn cynyddu’n gyson.
“Mae’r cyfnod clo yn dechrau cael effaith. Ar y cychwyn, efallai nad oedd merched yn gallu dianc ond erbyn hyn rydym yn gweld cynnydd cyson wrth i'r cyfyngiadau gael eu llacio.
“Bydd yr arian a ddyfarnwyd i ni gan y Comisiynydd Heddlu a Throsedd yn ein helpu i ariannu staff ychwanegol i gefnogi’r cynnydd yn nifer y defnyddwyr gwasanaeth. Mae'n hanfodol i ni ac rydym mor ddiolchgar i’r Comisiynydd Heddlu a Throsedd am ei gefnogaeth barhaus.
“Mae wedi bod yn anodd ymdopi â’n llwyth gwaith trwy gydol y pandemig ac mae’r cyllid ychwanegol hwn yn golygu y gallwn leddfu’r pwysau ar ein tîm.”
Dywedodd y Comisiynydd Heddlu a Throsedd: “Mae pob ffurf o gam-drin domestig yn drosedd ffiaidd ac yn rhywbeth rydw i wedi ceisio mynd i’r afael ag ef trwy fy Nghynllun Heddlu a Throsedd. Rhaid sicrhau bod lloches ar gael i ferched, a rhai dynion, os a phryd bynnag y maen nhw’n dioddef camdriniaeth.
“Mae'n bwysig sylweddoli nad ymosodiad corfforol yn unig yw cam-drin domestig. Mae cam-drin domestig yn gallu digwydd mewn sawl ffurf gan gynnwys rheolaeth, gorfodaeth a cham-drin rhywiol.”
“Rwy’n gobeithio y bydd yr arian rydw i wedi gallu dod o hyd iddo ar gyfer Cymorth i Ferched Clwyd Alyn yn golygu y gallan nhw barhau i helpu llawer o oroeswyr eraill fel Gloria i gyrraedd lle diogel ac i ddechrau adeiladu bywyd newydd i ffwrdd oddi wrth y rhai sydd wedi eu cam-drin.”
Gellir cael mynediad at y gwasanaeth a ddarperir gan Gymorth i Ferched Clwyd Alyn trwy ffonio Llinell Gymorth Am Ddim Byw Heb Ofn ar 0808 80 10 800 neu trwy eu ffonio'n uniongyrchol ar 01352 712150. Mae ganddynt swyddfa galw heibio yn 8 Stryd y Ffynnon, Treffynnon, a gellir anfon e-bost atynt yn cahawomensaid@clwydalyn.co.uk