Dyddiad
Mae cyn-droseddwr yn symud ymlaen gyda’i fywyd ar ôl cael achubiaeth gyda’r “tîm pêl-droed mwyaf amrywiol yn y byd”.
Cafodd y rhagolygon ar gyfer Nathan Hauton, 28 oed, eu trawsnewid yn llwyr wrth iddo ymuno gyda’r cyfuniad enfys rhyfeddol o chwaraewyr yng nghlwb pêl-droed Bellevue yn Wrecsam.
Cafodd Comisiynydd yr Heddlu a Throsedd Gogledd Cymru, Andy Dunbobbin, glywed yr hanes sut y rhodddodd Nathan ei hun yn ôl ar y llwybr cul.
Roedd Mr Dunbobbin wedi mynd draw i weld grŵp o chwaraewyr a Delwyn Derrick, sef y dyn a sefydlodd y clwb bum mlynedd yn ôl. Mae’n glwb rhyngwladol, gydag unigolion sy’n dod o amrywiaeth rhyfeddol o gefndiroedd, gan gynnwys grwpiau o bobl fregus, ffoaduriaid ac ymfudwyr.
Roedd Nathan wedi ei gael yn euog o ymosod tra’n feddw ar weithiwr brys, ond wedyn aeth ei fywyd i gyfeiriad gwahanol, diolch i glwb pêl-droed Bellevue.
Dywedodd Nathan: “Roeddwn i wedi dod i Bellevue am fod fy mrawd yn chwarae yma, felly fe wnes i feddwl dod draw a dechrau hyfforddi.
“Mi gefais gynnig lle yn y tîm ond wedyn dechreuais yfed gormod o alcohol, mynd i gyfeiriad drwg a dechrau troseddu.
“Ymhen dipyn mi oeddwn yng Ngharchar EM Berwyn, ond ar ôl dod allan mi wnes i siarad efo Delwyn.
“Dywedodd Delwyn bod ganddo ddiddordeb mewn fy nghael i ddechrau ar hyfforddiant ac y byddai’r clwb yn talu am gyrs hyfforddi i mi pe bawn i’n cadw oddi ar yr alcohol.
“Rydw i wedi bod yn hyfforddi am tua phedwar mis erbyn hyn ac yn helpu efo’r tîm cyntaf. Fi ydi rheolwr yr ail dîm a byddaf hefyd yn helpu efo’r tîm merched.
“Hyd yma, rydw i wedi cael fy nhrwyddedau Arweinydd Pêl-droed ac UEFA C, yn ogystal â chymwysterau mewn lles plant a chymorth cyntaf.
“Mae clwb pêl-droed Bellevue wedi fy nghadw fi ar y trywydd iawn a dw i ddim wedi cael unrhyw alcohol ers dros flwyddyn.
“”Rydw i ar brawf ac wedi trafod efo’r gwasanaeth prawf y posibilrwydd o wneud rhywfaint o waith ieuenctid efo troseddwyr ifanc, er mwyn rhoi rywbeth yn ôl i’r drefn cyfiawnder troseddol.”
Mae’r profiad o fod yn rhan o deulu clwb pêl-droed Bellevue hefyd wedi cael effaith gadarnhaol a newid bywyd i Nikki Thompson, 26 oed, ar ôl iddi hi a’i gwraig, sy’n dod o gefndir Twrcaidd, ddioddef camdriniaeth hiliol a homoffobig.
Dywedodd Nikki: “Ers yr ymosodiadau hynny, roedd hi’n amlwg bod ein hiechyd meddwl ni wedi dirywio ac nid oedd ein mab 16 oed yn teimlo’n dda chwaith.
“Mi ddaeth o i lawr i Bellevue a mwynhau bod yma. Mi wnes i ddod yma i’w wylio fo’n chwarae, gweld pa mor gyfeillgar oedd y tîm a chael fy annog i gymryd rhan fy hun. Roedd pawb mor rhyfeddol o dda.
“Rydw i’n credu fy mod i wedi ennill gwobr ‘hyfforddai gorau’r gêm’ yn y sesiwn gyntaf, os dw i’n cofio’n iawn, ac roedd hynny’n rhywbeth arbennig iawn i mi.
“Roedd yn gwneud i mi deimlo bod cymaint o groeso yma. Roeddwn i’n teimlo fy mod wedi cael fy nerbyn a bod gen i rywbeth mewn bywyd y gallwn weithio tuag ato, fel hobi gwirioneddol.
“Mae wedi newid fy mab a fy newid i. Fedra i ddim diolch digon i Bellevue.”
Mae Rolando Bertrand, 23 oed, yn geisiwr lloches wnaeth ddianc o Nicaragua gyda’i fam a’i chwaer yn 2019 pan oedd bygythiad i’w bywydau ar ôl iddo gymryd rhan mewn protestiadau yn erbyn y llywodraeth.
Ers iddo gyrraedd Wrecsam ar ôl cael ei adleoli yno gan yr awdurdodau, mae wedi gwneud defnydd da o’i sgiliau ar y cae ac oddi arno. Bydd yn gwneud gwaith gwirfoddol i nifer o wahanol gyrff, yn cynnwys Cyngor Ffoaduriaid Cymru a Thîm Cymorth Lleiafrifoedd Ethnig ac Ieuenctid Cymru. Mae Rolando yn berson di-wladwriaeth ac wedi bod yn fyfyriwr y gyfraith.
Yn y cyfamser mae’n parhau i geisio cael statws ffoadur ac eisiau cael cyfreithiwr i’w gynrychioli ef a’i deulu.
Mae awyrgylch arbennig clwb pêl-droed Bellevue wedi bod yn gefnogaeth fawr i Rolando trwy’r holl dreialon a helbulon y mae wedi’u hwynebu.
Meddai: “Mae’n fwy na dim ond pêl-droed. Mae’n mynd ymhellach na hynny. Rydan ni’n gwybod bod gan bêl-droed y gallu arbennig i ddod â phobl at ei gilydd, ond yma mae’n mynd i lefel gwbl wahanol.
“Mae yma bobl o Affrica, Portiwgal, America, y fi a phobl o wahanol gefndiroedd fel mudwyr economaidd a cheiswyr lloches.
“Mae’n gymysgedd o bopeth sy’n eich gwneud i chi dyfu fel person. Mae clwb pêl-droed Bellevue yn gwneud y byd yn lle gwell.”