Dyddiad
Gyda chyfnod y Nadolig yn agosáu mae swyddogion ar draws Cymru yn atgoffa pobl sy’n edrych ymlaen at noson allan i beidio yfed a gyrru neu yrru ar gyffuriau.
Mae’r pedwar heddlu yng Nghymru – Heddlu Dyfed Powys, Heddlu Gogledd Cymru, Heddlu De Cymru a Heddlu Gwent – wedi lansio eu hymgyrch yn erbyn yfed a gyrru a gyrru ar gyffuriau ac yn anelu dal pobl sy’n peryglu eu bywydau, a bywydau pobl eraill, drwy yfed a gyrru a/neu yrru ar gyffuriau.
Dywedodd yr Uwcharolygydd Simon Barrasford o Heddlu Gogledd Cymru mai bwriad yr ymgyrch yw ceisio atal bywydau rhag cael eu colli’n ddiangen oherwydd gyrwyr anghyfrifol sy’n torri’r gyfraith.
Ychwanegodd: “Ar ôl dwy flynedd anodd, yn naturiol, bydd pobl eisiau mwynhau eu hunain y Nadolig hwn. Mae’r heddlu’n awyddus i bobl fwynhau Cwpan y Byd, y Nadolig a’r Flwyddyn Newydd yn ddiogel.
“Rydym yn atgoffa aelodau o’r cyhoedd y gall mynd tu ôl i’r llyw o dan ddylanwad alcohol neu gyffuriau arwain at ganlyniadau difrifol.
“Nid dim ond am golli trwydded rydym yn sôn, sy’n aml yn arwain at golli swydd. Mae yfed a gyrru neu yrru ar gyffuriau’n arwain at lawer gormod o wrthdrawiadau difrifol ac angheuol. Gall hyn arwain at garchar a chanlyniadau ar gyfer sawl teulu.
“Mae nifer o’n swyddogion ni wedi gweld canlyniadau trychinebus yfed a gyrru a gyrru ar gyffuriau. Mae gorfod dweud wrth rhywun fod un annwyl iddynt wedi cael eu lladd oherwydd penderfyniad hunanol rhywun o dan ddylanwad yn un o’r rhannu gwaethaf o’n swydd ni. Gwnewch yn siŵr nad chi yw’r un sy’n gyfrifol am ddinistrio teulu’r Nadolig hwn.
“Bydd ein staff ar y ffyrdd yn edrych am bobl sy’n yfed a gyrru a gyrru ar gyffuriau. Gall unrhyw un sy’n cael ei ddal ddisgwyl fod yn y llys o fewn saith diwrnod ar ôl cael ei arestio.”
Yn ystod ymgyrch y llynedd, a gynhaliwyd o 1 Rhagfyr 2021 tan 1 Ionawr 2022, arestiwyd 115 o unigolion am yfed a gyrru, ac arestiwyd 72 am yrru ar gyffuriau yn ardal Heddlu Gogledd Cymru.
Dechreuodd ymgyrch estynedig 6 wythnos o hyd eleni yn erbyn yfed a gyrru neu yrru ar gyffuriau ar ddydd Llun 21 Tachwedd er mwyn cynnwys Cwpan y Byd. Bydd swyddogion ledled y wlad yn defnyddio tactegau wedi eu harwain gan gudd-wybodaeth a gwybodaeth leol ynghylch llecynnau problemus i ganfod pobl sy’n yfed a gyrru neu’n gyrru ar gyffuriau adeg y Nadolig.
Dywedodd yr Arolygydd Gareth Pearson o Uned Plismona Ffyrdd Heddlu Gogledd Cymru: “Wrth i dymor y Nadolig gychwyn, rydym yn atgoffa gyrwyr am beryglon a chanlyniadau yfed a gyrru neu yrru ar gyffuriau.
“Bydd swyddogion o’r Unedau Plismona Ffyrdd, y Gynghrair Plismona, Timau Cymunedol a’r Heddlu Gwirfoddol yn gweithio ddydd a nos, saith diwrnod yr wythnos. Dylai unrhyw un sy’n ystyried yfed a gyrru neu yrru ar gyffuriau wybod y byddwn ni allan yn disgwyl amdanynt.”
Mae’n debygol y bydd rhai partïon swyddfa’n dychwelyd eleni. Gan gadw hynny mewn cof, mae swyddogion yn gofyn i bobl gynllunio ymlaen llaw, meddwl am yr hyn y byddant o bosibl yn ei wneud, a sicrhau eu bod nhw’n trefnu tacsi i fynd â nhw adref. Maent hefyd yn atgoffa pobl mai dwy uned yw’r terfyn o ran yfed a gyrru, nid dau ddiod.
Ychwanegodd yr Arolygydd Pearson: “Mae ein neges yn syml. Os ydych chi allan ac yn gwybod y byddwch chi’n yfed, sicrhewch fod cynlluniau gyda chi ar gyfer mynd adref yn ddiogel, heb yrru. Os oes rhaid ichi yrru, fe’ch cynghorwn i beidio ag yfed alcohol o gwbl. Dim alcohol yw’r unig derfyn diogel.”
Dywedodd Andy Dunbobbin, Comisiynydd Heddlu a Throsedd Gogledd Cymru: “Mae yfed a gyrru neu yrru ar gyffuriau yn dinistrio bywydau. Rwyf yn falch o weld y bydd Heddlu Gogledd Cymru yn wyliadwrus dros gyfnod yr Ŵyl er mwyn dal y rhai sy’n gyrru o dan ddylanwad.
“Mae fy nghynllun ar gyfer plismona yng Ngogledd Cymru a diogelu cymunedau yn cynnwys diogelwch ar y ffyrdd. Mae pawb yn y rhanbarth â’r hawl i fynd allan a mwynhau’r cyfnod yn gwybod eu bod yn cael eu gwarchod rhag penderfyniadau a gweithrediadau hunanol pobl eraill. Dewch i ni gyd edrych ar ôl ein gilydd y Nadolig a’r Flwyddyn Newydd yma a chefnogi’r heddlu wrth iddynt weithio’n ddiflino drwy’r flwyddyn er mwyn ein diogelu a rhoi’r cyfle i ni fwynhau’r cyfnod gyda’u hanwyliaid.”
Mae Heddlu Gogledd Cymru wedi hymrwymo i ymdrin ag yfed a gyrru a gyrru ar gyffuriau drwy gydol y flwyddyn, nid dros gyfnod y Nadolig yn unig. Rydym hyd yn hyn eleni wedi gwneud dros 850 o arestiadau am yfed a gyrru a thros 740 o arestiadau am yrru ar gyffuriau.
Mae gwybodaeth gan y cyhoedd yn hanfodol er mwyn ymdrin â’r broblem. Felly os ydych chi’n ymwybodol am rywun sy’n gyrru o dan ddylanwad, gwnewch y peth iawn a hysbyswch drwy ffonio 101. Ffoniwch 999 os ydynt yn achosi perygl uniongyrchol. Fel arall, cysylltwch â Crimestoppers Cymru yn ddienw ar 0800 555 111.